احنا الجود احنا الكرم

http://www.facebook.com/group.php?gid=114134799721

توة بالله نسكت و الا نتكلم؟ توة القناة مولاها،الفاتق الناطق، سي طارق بن عمار و بونا سلفيو برلسكوني، آش تحب تشوف فيها؟مهرجان البرشني ببركوكش؟ قراءة ابستيمولوجية للحيرة الدفينة في ادب المسعدي؟ و لا كليب "احنا الجود احنا الكرم"؟؟زيد على هذا و دونو، هذاكا فاش زعام احنا، كان في السبان و الذمان! انا مانيش عاطيها الجنب هاذي نسمة و لا بصة غولة، اما الحق متاع ربي ريت فيها حاجات تعمل الكيف، و اللي التلفزة الوطنية، يرزيكم و يرزينا فيها عن قريب، ما تخلطشي تعمل الربع متاعو.شد عندك : سوسن معالج تبدع، اي نعم تبدع، ولو اني نفد مالطريفة متاع سيادتها كفنانة شيك و سمباتيك، مالانترفيووات اللي تعمل فيهم و اللي فيهم محقرانية و سنوبيسم يطلعولي البترول لمخي.ثانيا، برشة ناس جاو ضيوف في ناس نسمة، و تكلمو بحرية و بارياحية ماتسمعهاش في تونس ضبعة موش كي تبوس عينيك : توفيق الجبالي، محمد ادريس، النوري بوزيد، انور براهم، الخ الخ.ثالثا، كيف احنا قعدنا نستناو في برلسكوني باش يقويلنا سعدنا، كيما جبنا من قبلو جماعة كانال و حلينالهم الافق، يا سيدي بالطبيعة باش تسمع كلمة كلصون، و تراه كان لزم!اما اللي ما نخبوش نشوفوه و لا نقولو بيه، الي الباهي اكثر مالخايب في نسمة كيما في قناة الافق الله يرحم و ينعم، و اللي تحب و لا تكره، ما دامني راقدين نركركو في التاي و نتضيحكو على الحبيب ميقالو يقلد في فوزي البنزرتي (اللي بالمناسبة نحبو ياسر، كيما اي تونسي)، و اخطانا مالعيب و استر ما ستر ربي، بالله و الجاه لا تقوملنا قايمة، و ما نفيقو الا ما يفوت الفوت و يطلعو الفروخ متاعنا سيري كسرونة متاع روتانا و لحي اعوذ بالله متاع قنوات الجنة و النار و جازاك الله خيرا.
حتى في التنبير قاتلنا البخل، اخر ما نجمنا نعملو نكليكيو على فايسبوك
يا و الله حوال
يا و الله حوال